Un possibile futuro tragic pro le humanitate

per hkyson


In le mythologia del grecos classic, Nemesis esseva
le dea del vengiantia. Inter le buddhistas, on
parla del significantia karmatic del actiones.
In terminologia secular, isto vole dicer que actiones
bon ha le tendentia de producer resultatos bon.
Simultaneemente, actiones mal ha le periculo de
producer resultatos mal.

Es isto lo que occurre con nostre planeta? Si nos
essaya progredir de speculationes philosophic a
evidentia empiric, es evidente que le clima terrestre
nunc suffre modificationes con consequentias global.

Io non parla de seismos, que es le producto del
separation del continentes que nos cognosce del
massive continente cognoscite inter geologos con
le nomine Pangea. Le movimentos del continentes
es le resulato del mesme fortias subterranee que
produce tsunamis e vulcanos e lor eruptiones. Nostre
activitates sur le superficie de nostre planeta
non pote influentiar iste activitate subterranee,
que es completemente isolate de nostre atmosphera.

Cambios assatis recente in nostre atmosphera tamen
es un cosa multo differente. Unes scientistas crede
que tal cambios es solmente le producto de cyclos
natural que non ha cambiate de un maniera significante
in le curso de, que nos dice inter cinque o dece
seculos. Ma nos non cognosce precisemente le historia
de tal cambios proque nos ha disvellopate le
technologia pro documentar los es multo recentemente.
Ante 100 (cento) o 150 (cento cinquanta) annos,
le historia de iste cambios veni de fontes multo
imprecise.

Secundo un programma del Nationes Unite pro studiar
nostre ambiente planetari, durante le seculo passate
le temperatura terrestre ha augmentate inter 0.4
e 0.8 grados Celsius, e le elevation de nostre oceano
planetari ha augmentate inter dece e vinti centimetros
a causa del expansion de su aqua causate per le
calor solar que illo ha absorbite e anque a causa
del discongelation de nostre glacie polar, le qual,
il pare de plus in plus obvie, es in un processo de
acceleration.

Iste conditiones, secundo un crescente numero de
scientistas, producera, inter altere cosas, un taxa
plus alte de huracanes, un ex le quales tristemente
ha destruite un ex nostre citates picturesc de un
valor artistic e cultural inestimabile: New Orleans.

Un parte del problema es que le major parte de nos
in le Statos Unite non vole comprender le severitate
probabile de iste problema. Nostre governamento
federal nunc planifica le reconstruction de New
Orleans a un costo de inter $200.000.000.000 e
$300.000.000.000. Il es multo possibile que inter
cinque e dece annos post su reconstruction, un altere
huracan, etiam plus sever, lo destruera de un maniera
plus definitive.

Isto representa un costo mesmo plus grande que le
costo de nostre invasion de Iraq usque nunc, le
qual, de un maniera o de un altere probabilemente
habera resultatos completemente disastrose. Como
Louis XIV e su guerras inutile que ruinava le economia
de Francia, le politica exterior de nostre
administration ha facite de omne nos passageros
involuntari in un tren accelerante cuje rails duce
a un precipicio gigantic que poterea producer le
ruina de non solmente le population de nostre pais
ma anque le major parte del population del mundo.

Ma nos crede que nos non pote viver sin nostre
automobiles e camiones porcin que consume fluvios
de gasolina, e nos non pote imaginar le vita sin
nostre consumption de multe productos costose e
trivial que rapidemente perde lor valor economic e
lor capacitate pro amusar nos, le quales nos sempre
vole reimplaciar con nove provisiones de articulos
de consumo mesmo plus ridicule e trivial. Tal
productos es multo visibile in magazines como WalMart
e Nieman Marcus e simile casas de commercio mesmo
in Europa. Le capitalismo contemporanee non pote
superviver sin iste patronos de consumption continue
e frivole pro assecurar que le fluvios de moneta
al companias que manufactura e distribue iste merda
non se interrumpera.

Ma le fluxo de iste merda e su contrafluxo de moneta
exige energia, i.e. petroleo, un ressource finite
cuje production, secundo unes geologos qui es empleatos
de Exxon e altere companias de petroleo grandissime,
nunc comencia a devenir plus rar e plus difficile
a producer.

Intertanto China e India se industrialisa. E lor
demanda pro petroleo augmenta como le nostre durante
que le production mundial dininuera constantemente
con le tempore. Iste combination de circumstantias
es explosive e eventualmente potera provocar un
guerra inter China e le Statos Unite. China jam
ha dicite--ma non "officialmente"--que un guerra
con le Statos Unite provocara un responsa nuclear
chinese.

China nunc ha le capacitate de destruer al minus
dos o tres de nostre citates. Ma nos ha un numero
considerabile de submarinos con missiles thermonuclear
intercontinental. Solmente un parve fraction de
illos esserea sufficiente pro destruer le centros
de population plus grande de China, eventualmente
occidente grande numeros de americanos post producer
tempestas de foco cuje fumo obstruera le luce del
sol, destruente le major parte del agricultura mundial
e occidente multe del population del mundo con un
duple colpo de radioactivitate.

(Ron Cobb, un caricaturista politic californian
brillantissime, produceva un caricatura con le titulo
"Le humanitate monstrante su superioritate sur le
animales". Iste caricatura monstrava un rana sedite
qui reguardava con un expression de tristissime
surprisa a un homine cadaverose que habeva in un
mano un interruptor con un buton que ille imprimeva
con le altere mano durante que un nube de champignon
explodeva ex su cranio!)

Multo facilemente le Statos Unite poterea vider
se como iste homine cadaverose e le major parte
del resto del mundo como le rana impotente que etiam
nunc nos observa durante que nos nunc lentemente
invenena le vita de nostre planeta. Nostre nation
es responsibile pro 25% (vinti cinque pro cento)
del contamination del planeta con solmente 5% (cinque
pro cento) de su population human. Le taxa de nostre
contamination del planeta es plus alte que omne
le contamination causate conjunctemente per Rusia,
Japon, India, Germania, le Regno Unite, Corea, e
Italia. Le contamination causate per China es plus
modeste, solmente 13% (dece tres pro cento) del
total. Ma illes apprende enthusiasticamente de
nostre exemplo!

Le societates del mundo nunc destrue lente e
inexorabilemente su ressources e systemas natural.
Ma le major parte del humanitate simplemente non
pote contemplar lo que nos face. Le major parte
de nos participa allegremente in nostre suicidio
collective gradual, cuje taxa de destruction
eventualmente accelerara, ben que nos non pote predicer
exactemente como e quando. Multes ex nos vole cambiar
iste situation, ma quasi omne nos es un parve parte
del ingranage intra le machineria de nostre societates,
e nostre options pro cambiar los es multo limitate.

Quando nostre destruction collective deveni obvie,
le costos potera esser non solmente alitssime, ma
probabilemente impagabile. Le alarmas que nostre
planeta nos da in iste momento es quasi mute. Quando
illos deveni plus ruitose, il es possibile que forsan
90% (novanta pro cento) de nostre population morira
durante que nos apprende a superviver (si vermente
nos supervivera, lo qual non es inevitabile) como
nostre ancestres in le etate de petra.